კომპიუტერული თამაშები
კომპიუტერის გაჩენამ ახალი საფიქრალი მისცა მშობლებს: საზოგადოებაში სულ უფრო და უფრო ფეხს იკიდებს აზრი, რომ კომპიუტერულ თამაშებს ზიანის მეტი არაფერი მოაქვთ. აქვე აღსანიშნავია, რომ არსებობს კომპიუტერულ თამაშთა ჯგუფი: პირველი-თამაშები, რომლებიც არ შეიცავენ ძალადობის ელემენტებს და მეორე, თამაშები, რომლებიც ,,გაჟღენთილნი“ არიან ძალადობის ელემენტებით. შესაბამისად, მათი ზემოქმედებაც სხვადასხვაგვარად აისახება მოზარდის ფსიქიკაზე. პირველი სახის თამაშებს სარგებლობის მოტანაც შეუძლიათ მაშინ, როცა ძალადობის მომენტების შემცველ თამაშებს ზიანის მეტი არაფერი მოაქვთ. უდავოა ისიც, რომ თუ სათამაშოდ გამოყოფილი საათობრივი რეჟიმი არ სრულდება და ბავშვი დროის დიდ მონაკვეთს უთმობს თუნდაც უწყინარ თამაშს, მაშინ კომპიუტერი ,,მტრად“ გვევლინება.
მეცნიერებმა შესაბამისი გამოკვლევების საფუძველზე დაადგინეს, რომ ბავშვებს, რომლებიც განუწყვეტლივ თამაშობენ კომპიუტერულ თამაშებს, არ უვითარდებათ თავის ტვინის ის უბნები, რომლებიც დიდ როლს ასრულებენ ადამიანის ქცევის, მართვის და სწავლის პროცესში. აგრეთვე ავითარებს მათში აგრესის, ავიწროებს მათ ინტერესების სფეროს, აღარიბებს ემოციონალურ სამყაროს, იწვევს მხედველობის გაუარესებას, ხერხემლის გამრუდებას, ფიზიკურ სისუსტეს, მადის დაკარგვას და ა.შ. ფსიქოლოგების აზრით, როცა ბავშვი თამაშობს ძალადობის ელემენტების შემცველ კომპიუტერულ თამაშებს, აგრესიული ემოციები ვერ პოულობენ გამოსავალს და ისინი გროვდებიან ორგანიზმში.
ხშირად, ბავშვებს ყოველივე ის, რასაც კომპიუტერში ნახულობენ, რეალობაში ,,გადმოაქვთ“ (ბრჭყალებში იმიტომ, რომ ეს თავისთავად ხდება). ინტერნეტში ამის ერთი მაგალითი ვნახე: ერთმა შეძლებულმა ქალმა, რომელიც სათანადო დროს ვერ უთმობდა საკუთარ 7 წლის გოგონას, გადაწყვიტა მისთვის კომპიუტერი ეყიდა. მალე კომპიუტერულმა თამაშებმა უდიდესი ადგილი დაიკავეს გოგონას ცხოვრებაში: ის საათობით იჯდა კომპიუტერის მონიტორთან და თამაშობდა. ერთხელ, დედამ სახის ფერის სიმკრთალე შეამჩნია გოგონას და ძიძას დაავალა მისი სუფთა ჰაერზე გასეირნება. თქვენ წარმოიდგინეთ, სეირნობის დროს, გოგონამ ვერ დაინახა მის წინ აღმართული ბოძი და დაეჯახა მას. ამ ეპიზოდიდან ნათლად ჩანს, რომ ვირტუალურმა სინამდვილემ გოგონას ცნობიერებაში შეცვალა რეალური. ყველამ კარგად ვიცით, რომ კომპიუტერული თამაშის დროს იგივე ბოძი თავისით გაიწევა, თუ შესაბამის ღილაკს დავაჭერთ თითს.
წყარო:
http://gigakutxashvili.wordpress.com/2012/07/04/მე-და-კომპიუტერი/
კომპიუტერი დღესდღეობით ადამიანის ცხოვრების განუყოფელი ნაწილია. თანამედროვე ვითარებაში წარმოუდგენელია ადამიანის ცხოვრება კომპიუტერის გარეშე. ყველანაირ დაწესებულებაში და სახლების უმეტესობაში დგას კომპიუტერი.
კომპიუტერის საშუალებით ჩვენ შეგვიძლია მოვიძიოთ ინფორმაცია ნებისმიერი პიროვნების (ძირითადად, ცნობადის), მოვლენის და ა.შ. შესახებ; ვნახოთ ვიდეოები და მოვუსმინოთ მუსიკას, დავიკავშირდეთ ნაცნობებს სხვა ქვეყანაში და სხვა კომტინენტზეც კი; გავიგოთ მოსალოდნელი ამინდის შესახებ, შევიტყოთ ახალი ამბები, ვუყუროთ ტელევიზიას, შევადგინოთ სხვადასხვა დოკუმენტები, შევინახოთ ან გამოვაქვეყნოთ ნებისმიერი ინფორმაცია და, რაც ყველაზე ცუდია-ვითამაშოთ.
ერთი ძველისძველი გადმოცემის თანახმად, დამწერლობა ეგვიპტელთა ღმერთს – ტოტს-შეუქმნია და ფარაონისათვის უთქვამს: ამით კაცთა მოდგმას დავამახსოვრებ იმას, რაც შეიძლება დაავიწყდეთო. ფარაონი შეშფოთებულა; ჯერ ტოტის გამოგონებაზე მიუთითებია, შემდეგ - ადამიანის თავზე და უთქვამს: ეს (დამწერლობა) მოკლავს ამას(მეხსიერებას).
ამის შემდგომ კარგა ხანი გავიდა. ახლა ვითარება შეიცვალა და თვით წიგნსაც გამოუჩნდნენ კონკურენტები: ჯერ ფოტოგრაფიული გამოსახულება ამოძრავდა და კინოხელოვნება გაჩნდა, შემდეგ კი ტელევიზორმა დაიპყრო ქვეყანა. ამიტომაც ახლა ადამიანთა შიში წიგნის მომავალს დაუკავშირდა. დღეს ჯერ კომპიუტერზე მიუთითებენ, შემდეგ წიგნზე და კვლავ იმავე ფრაზას იმეორებენ : ეს (კომპიუტერი) მოკლავს ამას (წიგნს). ნუთუ მართლა ასე უნდა მოხდეს? აქ ერთი რამ უნდა გავითვალისწინოთ: არსებობს ორგვარი წიგნი: საკითხავი და საცნობარო. პირველს, ჩვეულებისამებრ, თავიდან ბოლომდე ვკითხულობთ; მეორეს (ცნობარებს, ენციკლოპედიებს) კი ხანგამოშვებით ვაკითხავთ, რათა საჭირო ცნობები ამოვიკითხოთ.კომპიუტერს შეუძლია მეორე სახის წიგნი შეცვალს, მაგრამ პირველს ვერ შეცვლის!!! როცა ადამიანი 10-12 საათის განმავლობაში უზის კომპიუტერს და დაღლილობისგან ლამის თვალები გადმოსცვივდეს, ბუნებრივია, სავარძელში მოხერხებულად მოკალათების და საყვარელი ლექსის ან მოთხრობის გადაკითხვის სურვილი გაუჩნდეს. კომპიუტერი წიგნიერების ახალი სახეა.კომპიუტერს შეუძლია ათასგვარი ინფორმაციის მოწოდება, მაგრამ წიგნის შეცვლა არ შეუძლია! კომპიუტერის გამოგონებით ადამიანმა დიდი ხნის ოცნება აისრულა: მას შეუძლია სურვილისამებრ ცვალოს და შეავსოს ტექსტები. მაგრამ მთავარი მანქანა, რომელიც ურიცხვი ტექსტის შექმნის საშუალებას იძლევა, ათასწლეულების წინ არის გამოგონებული და მას ანბანი ჰქვია!
